Tekststørrelse: 100%
Vigdis Hjorth og Kjersti Annesdatter Skomsvold kjem på Duun-stemnet
![](http://olav-duun.no/sites/default/files/imagecache/nyheter-300x250/nyheter/kjersti_annesdatter_skomsvold.jpg)
Vigdis Hjorth og Kjersti Annesdatter Skomsvold har begge fått prisar for diktinga si og er blant dei mest spanande romanforfattarane i Norge i dag. Stemnedeltakarane kan bli betre kjent med Hjorth og Skomsvold på bokbad og lesekveld fredag 28.juni på Tranås jernaldergård. Vigdis Hjorth skal og ha innleiing på litteraturseminaret dagen etter, om barnet i samtidslitteraturen og notidssamfunnet.
-Vi har lagt vekt på å få ein erfaren og spanande diktar og ein som er ung og lovande. Det har vi til fulle klart, seier stemnesekretær Torgeir Strøm. – Vigdis Hjorth debuterte i 1983. Dei første bøkene ho skreiv var barnebøker. Sia har ho skrive mange romanar om kvinna si stilling i samfunnet. Dei siste åra har romanane hennar teki opp andre aktuelle samfunnstema. For si siste bok «Leve posthornet» fekk ho nyss kritikarprisen 2012 for beste skjønnlitterære voksenbok. Ho fekk og kritikarprisen 1984 for barneboka «Jørgen + Anne er sant», som seinare har vorte filmatisert. I 2011 fekk Hjorth Gyldendalprisen. Vigdis Hjorth er og kjent for å vera ein kvass samfunnsdebattant. Så vi gler oss til å bli betre kjent med henne, seier Strøm.
-Kjersti Annesdatter Skomsvold fekk Tarjei Vesaas’ debutantpris i 2009 for si første bok «Jo fortere jeg går, jo mindre er jeg». Ho har og fått gode kritikkar for si andre bok «Monstermenneske», som kom ut i 2012. I begge bøkene tek ho utgangspunkt i sin alvorlege ME-sjukdom, som ho fekk i 20-årsalderen.
Skomsvold vaks opp på Lutvann i Oslo, men har sine aner frå Namdalen. Ja, ho kan jamvel trekke sine slektsgreiner til diktaren Olav Duun. Vi får eit spanande møte med Kjersti Annesdatter Skomsvold på Duun-stemnet. Det er Kjersti Annesdatter Skomsvold og Vigdis Hjorth sine bøker som blir liggande på nattbordet i vår, seier Strøm. – Velkommen til spanande Duun-stemne på Jøa.